1-البابا غنوج !!!!!! ممكن نعمله بعصير الليمون والملح والكمون ونستغنى عن الزيت والطحينة وانا بعمله كدة من سنين وولادى بيحبوه وبيكلوه معايا 2-الفول المدمس!!!!! بدل ما نغرقه فى السمن البلدى او حتى الزيت والطحينة ممكن نعمله بكذا طريقة كلها خالية من الدهون أ-نطحنه فى الخلاط ومعاه ثمرة طماطم وارجو متزعلوش من الطماطم عشان غالية اليومين دول ب- نخرط فيه بصلة صغيرة وعصير ليمون وكمون ج- نعمل طبق سلطة من كل الخضروات ونحطه على الفول المطحون بدون اى زيوت د-نخرط بصلة رفيع وعليها ثمرة طماطم ونحطها على نار هادية لمدة دقيقة او اتنين وننزل عليها بقرن فلفل حراق مفروم وبعدبن الفول ونهرس كله مع بعضه 3-الخضار زي الكوسة والجزر والبطاطس بدل ماناكله مسلوق او مطبوخ ممكن نشويه بطريقة سهلة نجيب قطعة من ورق الفويل ونضع عليها ثمرة الخضار المقشر المغسول ورشة ملح وفلفل اسود ونلف الورقة زى البونبونى وندخلها الفرن او الميكروويف بيبئى طعمها احلى كتير من المسلوق ولو حتى على البخار ونراعى ان الكوسة مثلا تكون كبيرة عشان تتحمر من برة ويبئى فيها قلب طرى من جوة وانا بشوى الخضار مع الفراخ فى الفرن ومعاهم 4-الرز المعمربدون سمن بنقع الرز لمدة ساعة عشان نتخلص من النشا وبعدين بقلبه بمعلقة قشطة من وش اللبن اللى بنشربه بعد مانشيل وشه اساسا وبعدين نضيف شوية لبن وشوية ميه قليلة وسنة ملح وندخله الفرن بيبئى تحفة بس تغطيه 5 دقايق بعد ما يطلع من الفرن عشان الوش يعرق وماينشفش 5-محشىالكوسة!!!!!!! نجيب الكوسة الكبيرة بردو واقصد التخينة ولما نؤرها نخلى السمك بتاعها تخين يعنى مانفضيهاش اوى ونكتر البصل والخضرة وبكدة كيلو الكوسة ياخد كوب واحد من الرزوبرد و ثمرة او اتنين طماطم مش ضرورى نكتر 6-الكشرى !!!!!!!!!نعمل كل حاجة مسلوقة يعنى نسلق الرز ونصفيه زى المكرونة وزيهم العدس نعمل الصلصة بمعلقتين صلصة جاهزة ونضيف لها الخل والليمون وفص توم نى مفروم ويتاكل سخن وطبعا كميات صغيرة 7-ليه لما نجوع بالليل نقوم ندبها وننام بالعكس ناكل حاجة خفيفة يعنى مثلا فنجان ترمس ولو هتاكلى زبادى اضيفى له قطعة جبنة قريش واهرسيهم مع بعض طعمه حلو وكله حرق وكليهم من غير عيش عشان بعد الساعة تسعة مافيش حرق للغذاء اللى بناكله 8-سلطة التونة !!!!!نصفى التونة من الزيت كويس بمصفى سلك ونحضر السلطة اللى بتتكون من كابوتشى او خس بلدى مقع صغير وعليه جزرة مبشورة ونصف ثمرة بنجر مبشورة وبعض قرون الفلفل المقطع صغيرا ويقلب مع التونة ويضاف عصير الليمون وبعض الخل وطعمها شهى جدا والولاد بيحبوها اوى وغنية بالفيتاميناتوممكن طبع نستخدم التونة المفرومة وليست القطع لانها ستقلب مع الخضار والمهم هو الطعم والفائدة
9- صينية السمك الماكريل !!!!ودى سهلة اوى وشهية جدا بعد غسل كيلو من السمك وتنضيفه يرش بعض الخل داخل كل سمكة يادوب قطرات وتترك 10دقايق ثم يعاد شطف السمك وفصل جانبى السمكة يعنى نقسمها بالطول ثم تتبل بتوم مفروم مع قرن فلفل حراق وعصيرليمون وملح فى هذه الاثناء نقطع الخضار وهو عبارة عن 2جزرة مبشورة و6 قرن فلفل اخضر رومى و2ثمرة طماطم و2بصلة ويقلب الخضار مع جزء من تتبيلة السمك 0التوم وافلفل الحراق والليمون ويضاف له ثلث كوب خل ويفرد ثلث الخضار فى قاع الصينية ويرص فوقه السمك ثم باقى الخضار ويوضع على نار عالية حتى يغلى ثم نار هادئة ويوضع اسفل الشواية بعض الدقائق حتى يحمر الوجه ويعتبر وجبة كاملة لان الماكريل يحتوى على زيت اوميجا ثرى مع البروتين والخضار وناكله بالعيش الاسمر مفيد فى الحرق جدا وغنى بالفيتامينات وزيت اوميجا ثرى مفيد للقلب وبيخسس وبيقلل الكوليسترول 10-بصفة عامة لو عايزين ناكل طبيخ بلاش التقلية وكدة وممكن نسلق الطماطم فى الشوربة 5 دقايق وبعدين نعصرها هتغير طعم النى فى نى ونخرط البصل فى اناء الطهى ونحط عليه نصف كوب شوربة ونسيبه على النار لحد مايشربها ونقلب بمعلقة خشب لحد ما لونه يصفر ونضيف الطماطم المعصورة ونقلب شوية وبعدين نضيف الخضار وشوية شوربة وبكدة يبئى كل الاكل خالى من الدهون والرز ننقعه نص ساعة ونصفيه وبعدين نسلقه فى الشوربة من غير دهون بردو وعلى نار هادية طبعا الكلات دى قديمة ومش اختراع بس حبيت اثبت لكم وجهة نظرى وطبعا برحب بكل الآراء واللى تعرف اكلة من النوع ده تتفضل تتحفنا والهدف ان نظام حياتنا كله يتغير مش شوية ريجيم وبعدين نعك بس بردو منحرمش نفسنا اوى عشان منزهئش وطبعا الفاكهة اساسية ونتعامل معاها على انها وجبة منفصلة ومنكلهاش بعد الاكل مباشرة ولكن بين الوجبات ارجو اكون قدمت ولو معلومة ان شالله لفتوكة واحدة وشكر
